O Concello de Santiago de Compostela anunciou este luns a concesión demanial dunha parcela á Asociación de Dano Cerebral Sarela (ADS) para a construción dun novo edificio no Castiñeiriño, destinado a ser un centro de día e ocupacional para persoas afectadas por dano cerebral adquirido. Así o comunicou a alcaldesa Goretti Sanmartín durante unha rolda de prensa posterior á xunta de goberno local.
A parcela concedida, de 305 metros cadrados, está situada xunto ao edificio actual da asociación, co obxectivo de ampliar e dar continuidade ás instalacións existentes. Segundo Sanmartín, esta nova infraestrutura permitirá “mellorar” as instalacións actuais e incrementar a “capacidade” de atención aos usuarios.
A concesión demanial outórgase por un prazo de 30 anos, con opción a prórroga ao final do período, o que asegura a estabilidade da asociación para desenvolver o seu traballo de forma continuada. A alcaldesa destacou que este proxecto era unha demanda histórica do colectivo e que, con esta decisión, ponse “punto e final” a unha necesidade de longa data.
Sanmartín tamén subliñou que este novo espazo contribuirá a que Santiago se consolide como “un lugar de referencia” na atención a persoas con dano cerebral, reforzando o papel da cidade no ámbito da asistencia social.
RENOVACIÓN DA ILUMINACIÓN DO CAMPO DE FÚTBOL DE AS CANCELAS
Ademais, a xunta de goberno local aprobou a adxudicación á empresa Sielvigo SL do contrato para a renovación da infraestrutura de iluminación e do peche perimetral suroeste do campo de fútbol As Cancelas. O proxecto, que conta cun orzamento de 166.443 euros, inclúe tamén a instalación de megafonía e dun marcador electrónico.
Sanmartín subliñou a “necesidade e imprescindibilidade” desta intervención, que se estima que dure aproximadamente seis semanas. As obras buscan resolver os problemas de inestabilidade das torres de iluminación e substituír o peche perimetral da fronte suroeste, que presenta graves deterioracións estruturais.
Con estas melloras, o Concello pretende “actualizar” o campo de fútbol As Cancelas, garantindo unha infraestrutura moderna e segura para os usuarios.
