A Xunta e o Concello de Santiago ratificaron este venres coa súa firma o protocolo para humanizar e ordenar a contorna e acceso ao Hospital Clínico compostelán, así como para a construción do novo aparcadoiro do complexo, que terá 1.000 prazas e cuxas obras non comezarán como “mínimo” ata 2026.
No acto participou a conselleira de Vivenda e Planificación de Infraestruturas, María Martínez Allegue, o conselleiro de Sanidade, Antonio Gómez Caamaño, e a conselleira de Medio Ambiente, Ángeles Vázquez, por parte da Xunta, así como a alcaldesa de Santiago, Goretti Sanmartín.
Neste protocolo establécense as bases de colaboración entre ambas as administracións para a realización do Proxecto de Interese Autonómico (PIA) para a reordenación da accesibilidade e mobilidade na contorna do CHUS, así como para a construción do novo aparcadoiro. Paralelamente, incluíuse tamén un investimento de ata 3,5 millóns para saneamento e abastecemento nas parroquias rurais de Santiago.
SANEAMENTO NO RURAL
Ademais destas actuacións, como destacou Ángeles Vázquez, o protocolo inclúe un investimento de ata 3,5 millóns para cofinanciar obras de saneamento e abastecemento en parroquias do rural de Santiago. Con iso, o Goberno galego estudará os proxectos que presente o concello e avaliará as necesidades co compromiso de achegar o 70% do investimento daqueles que se executen.
UN “ORGULLO COLECTIVO”
Un “orgullo colectivo”, así é como cualificou a rexedora compostelá este acordo entre as dúas administracións que permitirá desbloquear unha vella reclamación para a mobilidade o Clínico. A medida, lembrou, beneficiará tanto aos composteláns como aos máis de 450.000 habitantes de 46 concellos que conforman en área de influencia deste hospital. Ademais da achega económica, o concello tamén realizará a bonificación do IBI destas obras e das que actualmente están en marcha no hospital, a modificación de plans necesarios, a expropiación de terreos e os cambios nas liñas de transporte urbano.
Para Goretti Sanmartín, esta fórmula de colaboración e entendemento é “o camiño que hai que impulsar” para os “retos de futuro” dos concellos, como o son o equilibrio turístico, o impulso industrial ou a prestación de servizos.
O conselleiro de Sanidade, pola súa banda, dixo que é un “día importante” para “solucionar un problema de longa duración” como é o déficit de aparcadoiro e os problemas de accesibilidade do CHUS, un “centro en expansión”. “Con capacidade de diálogo, a política pode ser unha extraordinaria ferramenta para mellorar a vida da xente”, dixo Antonio Gómez Caamaño.
