O concelleiro de Mobilidade de Santiago, Xan Duro, afirmou que a aplicación do bus urbano ‘+Bus’ xa está a funcionar, despois dos fallos rexistrados nos últimos días, pero sinalou que desde o Concello solicitarán os informes necesarios para ver se “hai que tomar algunha medida”.
A preguntas dos medios nunha visita á Praza de Abastos, Xan Duro explicou que este xoves houbo “unha inspección” da empresa municipal Tussa no servizo e liquidouse “provisionalmente”. Agora, apuntou, teñen que corrixir “algúns elementos de hardware” que “deben renovar”, pero, agora mesmo, insistiu, “a aplicación está a funcionar”.
“Seguimos moi vixiantes e solicitamos todos os informes necesarios para ver se hai que tomar algunha medida; que se tomará sen dúbida ningunha”, resolveu.
