O concelleiro de Mobilidade de Santiago, Xan Duro, avanzou que o Concello realizará este xoves pola mañá unha “inspección oficial” a Tralusa, empresa concesionaria do servizo de autobús urbano, ante os problemas de funcionamento da aplicación ‘+Bus’ rexistrados desde o martes.
“Non é aceptable que esteamos así a estas alturas”, esgrimiu con dureza o edil. Ao ser preguntado sobre estas incidencias tras a xunta local de seguridade para as Festas do Apóstolo, Duro avanzou que se fará esta inspección para “ver as causas”, preguntar “as razóns” dos fallos e “tomar as decisións que teñan que tomar” como goberno local.
“Unha incidencia podémola ter calquera. Tantas incidencias continuadas esixen responsabilidades e explicacións”, recalcou o concelleiro.
O responsable de Mobilidade do goberno de Goretti Sanmartín dixo descoñecer as causas deste mal funcionamento, pero é “unha responsabilidade da empresa” que xestiona o servizo e, por tanto, esixiu que o solucione.
A inspección levará a cabo por técnicos da empresa municipal Tussa nas dependencias de Tralusa, onde están os equipos informáticos desde os que se ofrece o servizo.
