O alumnado da materia de Redacción Informativa do primeiro curso do grao de Xornalismo na Universidade de Santiago de Compostela, sacou á luz o proxecto ‘Ponte de Palabras. Xornalismo colaborativo e transmediático especializado na migración’, unha publicación que quere contribuír a mellorar a información sobre a cuestión migratoria.

A guía foi realizada coa coordinación dos profesores José Casás, Xosé López e Ana Isabel Rodríguez Vázquez e conta coa colaboración do Colexio Profesional de Xornalistas de Galicia e o Grupo de Investigación Esculca, da Facultade de Ciencias da Educación.

Ponte de Palabras continúa o labor iniciado coa Guía de linguaxe inclusiva, así como as de Proxecto Broto, Proxecto Xermolo, Proxecto Ikigai e Proxecto FACTCOM, redactadas polo alumnado de anos anteriores.

A guía consta de cinco apartados diferenciados, comezando por un panorama da actual situación na sociedade respecto a cuestión migratoria, con especial foco na realidade histórica galega. No segundo dos epígrafes, ‘Xornalismo e migración’, analízanse a responsabilidade que ten a profesión no tratamento de informacións relativas a esta temática. En ‘Fontes e referencias’ ofrécese unha listaxe de fontes expertas, entidades e organismos institucionais aos que acudir á hora de facer coberturas sobre migración e ‘Entrevistas’ constitúe un espazo para dar protagonismo a voces especializadas, desde diferentes perspectivas.

A ‘Guía de boas prácticas’ é o apartado máis completo, cun decálogo con recomendacións para abordar o tratamento de informacións sobre migración. O epígrafe conclúe con algúns estudos de caso en medios de comunicación do ámbito español.