As obras de reurbanización da rúa do Pombal, en Santiago, comezarán o próximo 25 de xuño tras finalizar o curso escolar para reducir o seu impacto na mobilidade.
Os traballos nos que investirán máis de 730.000 euros, permitirán mellorar a accesibilidade e renovar a rede de servizos, á vez que “son reflexo” da aposta por un “novo modelo urbano” que prioriza a mobilidade peonil e ciclista.
Así o detallaron este mércores os concelleiros de Obras, Xesús Domínguez, e Mobilidade, Xan Duro, que explicaron o proxecto e informaron as súas repercusións no tráfico e no transporte urbano.
As obras, das que foi adxudicataria a UTE formada por Oviga e Inside the estafe, teñen un prazo de execución estimado de oito meses.
Domínguez explicou que O Pombal é unha rúa con “problemas de accesibilidade”, pero ademais localízase nunha zona con “diferentes centros educativos” polo que consideran que mellorar a seguridade é unha prioridade.
Na rúa do Pombal haberá unha única beirarrúa, situada á beira dos edificios, que terá un ancho ampliado de 1,8 metros. A estrada quedará cun ancho de tres metros e acondicionarán un carril bici en sentido subida, á beira do muro da Alameda.
A rúa está configurada como unha plataforma única, cunha diferenza de altura de tan só uns centímetros entre a calzada e a beirarrúa, para as que utilizarán diferentes materiais. Ademais, haberá pasos de peóns elevados, para reducir a velocidade do tráfico rodado.
As obras tamén afectarán á rede de transporte, xa que son sete as liñas de autobús que circulan por esa vía. En concreto, son as liñas 4, 8, 9, C2, C4, P1 e P7, que cambiarán o itinerario.
