O I Premio Internacional Afundación de Investigación Educativa reunirá en Santiago a expertos internacionais en educación comparada, ademais de entregar o galardón do mesmo ao catedrático honorífico emérito da Universidade de Indiana, en Estados Unidos, Robert F. Arnove.
Segundo informa a entidade, recibirá o seu galardón o martes 11 de xuño nunha cerimonia que estará precedida por unha mesa redonda.
Arnove, un dos máis reputados expertos en educación comparada a nivel mundial, recollerá a distinción no Centro Obra Social Abanca.
Trátase dun galardón que lle outorgou por unanimidade o xurado entre un total de 111 candidaturas presentadas. Na primeira parte deste evento, e precedendo á entrega do premio, desenvolverase unha mesa redonda sobre educación comparada.
Nela, participarán o propio Robert F. Arnove, que estará acompañado polos expertos Mariano Fernández Enguita, da Universidade Complutense de Madrid, e Luís Miguel Lázaro Lorente, da Universidade de Valencia. O catedrático de Teoría e Historia da Educación da Universidade de Santiago (USC) Miguel Anxo Santos Rego exercerá de moderador.
