A subdelegada do Goberno na Coruña, María Rivas, e a alcaldesa de Santiago, Goretti Sanmartín, presidiron este luns a Xunta Local de Seguridade na que se analizaron as medidas previstas para o festival O Son do Camiño, que terá lugar este fin de semana, e para o que se contará con 225 persoas para o dispositivo especial.
Segundo apuntaron, dadas as características do evento e de igual maneira que en anos anteriores, haberá unha presenza reforzada de Policía Nacional e da Garda Civil de Tráfico, así como da Policía Local xunto con servizos de seguridade privada.
En canto á Policía, a subdelegada confirmou que haberá un dispositivo que contará con unidades caninas, Tedax, unidade de seguridade aérea con drons, un dispositivo de prevención de furtos, a brigada móbil con presenza tamén nas estacións de viaxeiros, e tamén unidades da UIP (Unidade de Intervención Policial).
O dispositivo verase reforzado tamén con máis de 60 axentes da Garda Civil de Tráfico durante os tres días de concerto.
Segundo explicaron, todos estes efectivos estarán coordinados co servizo ordinario de prevención e reacción da propia cidade, polo que se sumarán aos efectivos de seguridade cidadá da comisaría local.
A afluencia prevista dunhas 40.000 persoas obriga a deseñar un operativo especial que “garanta a seguridade desde un punto de vista estático, é dicir, durante os concertos que se desenvolven en tres escenarios distintos, como dinámico, garantindo as vías de acceso, tanto das persoas como dos equipos sanitarios e de emerxencias, en caso de ser necesarios”.
Por outra banda, fixeron un chamamento para que “todas as persoas que asistan aos concertos, fagan caso ás indicacións da organización, que sexan respectuosas coas medidas de seguridade e sigan as indicacións da organización e das forzas de seguridade, xa que todos teñen como única pretensión o mellor desenvolvemento dos concertos para goce de todas as persoas asistentes”.
