A Xunta puxo en marcha este venres o traslado da tecnoloxía clínica e do equipamento ao renovado centro de saúde de Conxo, en Santiago de Compostela, coa previsión de que a actividade asistencial poida desenvolverse xa nas instalacións reformadas desde a mañá do próximo luns.
Os traballos de traslado comezaron unha vez rematadas as consultas deste venres e prolongaranse ao longo de toda a fin de semana. A planificación busca completar o cambio sen interferir na prestación sanitaria e deixar preparados tanto os postos dos profesionais como os dispositivos necesarios para atender con normalidade aos pacientes desde o inicio da próxima semana.
Unha empresa especializada en loxística sanitaria asumirá o movemento dos principais equipos clínicos. Entre o material que debe quedar instalado no edificio atópanse un retinógrafo, un ecógrafo, un electrocardiógrafo e un dispositivo portátil MESI para a realización de medicións clínicas.
Paralelamente, os profesionais de mantemento e o persoal da Subdirección de Sistemas e Tecnoloxías da Información da Área Sanitaria de Santiago e Barbanza encargaranse de poñer en funcionamento os ordenadores, as redes e os sistemas de comunicacións necesarios para o traballo diario dos equipos sanitarios e administrativos.
A recuperación das instalacións reformadas non suporá aínda a conclusión de todas as actuacións no exterior. Durante os próximos días, a entrada dos usuarios realizarase de maneira provisional por un acceso lateral.
Esta solución permitirá desmontar os módulos prefabricados que se empregaron durante a reforma para manter aberta a atención sanitaria e continuar cos traballos de acondicionamento da nova entrada principal. O acceso habitual foi redefinido dentro da intervención integral realizada no edificio.
As obras quedaran rematadas no pasado mes de xullo despois dun investimento superior aos 5,5 millóns de euros, financiado pola Xunta con cofinanciamento europeo a través do programa operativo FEDER Galicia 2021-2027.
Un dos principais cambios introducidos pola reforma é o aumento da capacidade do centro. A superficie destinada á asistencia sanitaria pasa duns 400 metros cadrados a preto de 1.000 metros cadrados útiles, máis do dobre do espazo dispoñible antes da intervención.
NOVOS SERVIZOS PARA MÁIS DE 5.000 USUARIOS
A ampliación permitirá reorganizar as consultas e incorporar novas prestacións para os máis de 5.000 veciños adscritos ao centro de saúde de Conxo. Entre as novidades previstas figura unha unidade de saúde bucodental, ademais de espazos de maior tamaño para o desenvolvemento da actividade dos profesionais.
A actuación abrangue tamén as dúas unidades de saúde mental situadas en Conxo, que foron renovadas dentro do mesmo proxecto. Estes servizos teñen unha área de referencia considerablemente maior que a do propio centro de atención primaria, xa que prestan asistencia a arredor de 150.000 persoas de Santiago de Compostela e de diferentes concellos da súa contorna.
