A Universidade de Santiago de Compostela vén de abrir esta mañá, por segunda vez, as urnas electrónicas para a segunda volta das eleccións á reitoría, un proceso que determinará quen será a persoa encargada de dirixir a institución académica durante os vindeiros seis anos.
Nesta fase final do proceso electoral enfróntanse as catedráticas Rosa Crujeiras, de Estatística e Investigación Operativa, e Maite Flores, de Óptica. A votación realízase de maneira electrónica a través da plataforma habilitada pola universidade, á que se accede mediante credenciais institucionais.
O período de votación estenderase entre as 9:00 e as 18:00 horas, tempo durante o que a comunidade universitaria poderá emitir o seu voto. A USC ofrecerá avances de participación ás 12:00 e ás 16:00 horas a través do espazo web habilitado para garantir a transparencia do proceso.
Segundo os datos facilitados pola institución, un total de 28.326 persoas están chamadas ás urnas. A maior parte do censo corresponde ao estudantado, con 24.158 persoas, mentres que 1.573 pertencen ao Persoal Técnico de Xestión e Administración de Servizos, 1.354 son Persoal Docente e Investigador con vinculación permanente e 1.241 forman parte do resto do PDI.
Unha vez rematada a votación e realizado o escrutinio, os resultados finais poderán consultarse na web habilitada pola USC para o proceso electoral. Durante a xornada tamén se habilitou o correo electrónico evoto@usc.es para comunicar posibles incidencias relacionadas coa votación.
O calendario electoral establece que o 12 de marzo se proclamará provisionalmente a reitora electa. A continuación abrirase un prazo para presentar recursos ante a Comisión Electoral Central, que se prolongará entre o 13 e o 20 de marzo. A proclamación definitiva da nova reitora da Universidade de Santiago de Compostela está prevista para o 23 de marzo.
A elección deste mércores permitirá que a USC conte por primeira vez na súa historia cunha muller á fronte da reitoría, ao tratarse dunha segunda volta na que as dúas candidatas finalistas son mulleres.
