O delegado do Goberno en Galicia, Pedro Branco, destacou o valor do patrimonio histórico albergado no Museo do Pobo Galego, en Santiago, e animou á cidadanía a coñecelo.
Tal e como trasladou a Delegación do Goberno en Galicia nunha nota de prensa, Branco remarcou desde o museo que “a mellor forma para seguir tecendo o futuro de Galicia desde as raíces é ser conscientes do pasado”.
Durante a visita á institución, o padroado do Museo explicoulle os proxectos en marcha e os retos presentes do museo. Pola súa banda, Branco trasladoulles o afán do Goberno por “impulsar a cultura galega en todas as súas formas”, ademais de “dinamizar o tecido asociativo galego deste sector”.
Pedro Branco percorreu as diferentes salas do edificio, “cheas dunha riqueza con infinito peso cultural”, e agradeceu o traballo de conservación e puxo en valor da historia de Galicia ao persoal do museo.
Finalmente, o delegado reivindicou a función tanto do padroado, personificado en Concha Losada, como dos traballadores “de trasladar a memoria de Galicia ás futuras xeracións”, un traballo “capital para construír un país democrático, libre e orgulloso do seu pasado mediante a conciencia das súas raíces”.
