A Catedral de Santiago acolle desde esta semana unha exposición temporal de libros de viaxes históricas, que se pode visitar na propia Biblioteca Capitular, accesible con calquera modalidade de visita do Museo catedralicio.
‘Outras historias, outros mundos. Libros de viaxes da Biblioteca Capitular’ é o nome desta mostra na que se expón unha ampla selección de libros con mapas, planos e ilustracións dos séculos XVI, XVII e XVIII.
Conta cunha interesante mostra de mapas e planos de África, América do Sur, Rusia e China, así como destacados libros de viaxes do continente europeo (Italia, Francia, Grecia, Inglaterra, Bélxica, Países Baixos e España).
Escritos en diferentes idiomas (latín, francés, inglés, español e italiano), oito deles atópanse dixitalizados polo que se poden consultar nun dispositivo electrónico, mediante o escaneo dun código QR.
