A USC vén de pechar a xornada de votación electrónica para a elección da nova reitora e fixo públicos os resultados definitivos tras o escrutinio. Ningunha das catro candidatas acadou a maioría absoluta —máis do 50% dos votos ponderados—, polo que o proceso continuará cunha segunda volta entre as dúas aspirantes máis apoiadas.
Segundo os datos oficiais, os resultados ponderados sitúan a Rosa Crujeiras en primeira posición cun 41% dos votos, seguida de Maite Flores, que obtivo un 21%. Tamén con 21% figura María José López Couso (aínda que con 33 votos ponderados menos que Flores), mentres que Alba Nogueira acadou o 15% dos apoios ponderados.
DISTRIBUCIÓN DO VOTO POR SECTORES
No reconto global, Crujeiras sumou 4.480 votos (985 ponderados), con especial respaldo no Sector I —profesorado doutor con vinculación permanente—, onde obtivo 459 apoios (19% do voto ponderado total). Tamén liderou no estudantado (Sector III), con 2.995 votos emitidos a favor da súa candidatura.
Flores reuniu 2.354 votos (536 ponderados), mentres que López Couso acadou 1.845 votos (503 ponderados). A diferenza entre ambas no cómputo ponderado foi de tan só 30 votos, o que determinou que sexa Flores quen pase á segunda volta. Nogueira sumou 1.567 votos (380 ponderados).
PARTICIPACIÓN FINAL: CASE O 96% NO PROFESORADO PERMANENTE E MÁIS DO 30% NO ESTUDANTADO
A participación global situouse no 37,49% do censo total (28.327 persoas), cun comportamento desigual segundo sectores.
O Sector I rexistrou unha participación do 95,94%, mentres que o Sector IV (PTXAS) alcanzou o 86,71%. No Sector II (resto do PDI) votou o 71,04% do censo.
Destaca especialmente o dato do Sector III, correspondente ao estudantado, cunha participación do 30,83% (7.190 votos a candidaturas), unha cifra superior á habitual en procesos electorais universitarios e que superou o 30% do censo estudantil.
FACULTADES CON MAIOR MOBILIZACIÓN DO ESTUDANTADO
No Sector III obsérvanse diferenzas significativas entre centros. A Facultade de Matemáticas rexistrou unha participación do 60%, mentres que na Facultade de Óptica e Optometría foi do 57,09%, situándose entre as máis elevadas do conxunto da USC.
Tamén superaron o 40% centros como Farmacia (41,97%) e Física (42,70%). Pola contra, noutras facultades a mobilización estudantil situouse por baixo do 25%.
A elevada participación en Matemáticas —onde é catedrática Rosa Crujeiras— e en Óptica —onde exerce como catedrática Maite Flores— coincide cos dous centros vinculados academicamente ás candidatas que pasan á segunda volta. A escasa diferenza no voto ponderado entre Flores e López Couso puido facer ao estudantado un factor determinante para configurar o resultado final da primeira volta.
ANTONIO LÓPEZ AGRADECE A ELEVADA PARTICIPACIÓN
Pola súa banda, o actual reitor da Universidade de Santiago de Compostela, Antonio López, celebrou o desenvolvemento da xornada electoral e felicitou ás candidatas Rosa Crujeiras e Maite Flores por pasar á segunda volta. Nun audio remitido aos medios, tamén trasladou o seu recoñecemento a María José López Couso e Alba Nogueira, ás que felicitou, do mesmo xeito que ás dúas finalistas, “por contribuír entre todas ao debate institucional ao redor do futuro da universidade”.
López destacou especialmente o nivel de mobilización rexistrado nesta convocatoria. “Temos ademais que congratularnos pola participación, con especial atención ao estudiantado, que superou o 28% do seu censo”, sinalou. Así mesmo, agradeceu o labor do persoal implicado na organización do proceso electoral, subliñando que na xornada “se demostrou a eficacia do voto electrónico como ferramenta incentivadora da participación”.
RENOVACIÓN INSTITUCIONAL
A votación desenvolveuse entre as 09:00 e as 18:00 mediante o sistema electrónico habilitado pola USC. Coincidindo coa elección á reitoría, tamén se celebraron as eleccións ao Claustro Universitario, máximo órgano de representación da comunidade académica; ás Xuntas de Centro e aos Consellos de Departamento.
A segunda volta decidirá quen asumirá a reitoría da USC nos próximos seis anos, nun proceso que mantén a mobilización da comunidade universitaria tras unha primeira votación marcada por unha participación elevada en varios sectores e por unha diferenza axustada na loita polo segundo posto.
