A alcaldesa de Santiago asegurou que o seu goberno está “a mirar as opcións” para determinar se é necesario pór en marcha “algún tipo de reforzo” no ámbito da mobilidade para asumir o incremento de operacións no aeroporto de Santiago, que asumirá as de Peinador mentres dure o seu peche por obras.
A preguntas dos medios, Goretti Sanmartín dixo que esta cuestión “se está falando” e que están encima da mesa “ferramentas a medio prazo” para mellorar a mobilidade desde o aeroporto, como “máis licenzas de taxi” ou unha liña propia coa intermodal no novo contrato de autobuses. Para a “cuestión puntual” do peche de Peinador, engadiu, a concellaría de Mobilidade “está a ver que tipo de programación” é necesaria, aínda que Aena trasladoulles que a capacidade do Rosalía de Castro “é suficiente para asumir” estas novas operacións.
