O Concello de Santiago, a través do departamento de Dereitos Sociais, porá en marcha no primeiro semestre do ano o Consello Municipal da Infancia, un órgano estable de participación co obxectivo de garantir que as nenas e nenos poidan expresar a súa opinión e formar parte activa da vida municipal. O anuncio foi realizado este martes pola concelleira María Rozas, quen subliñou que esta iniciativa dá cumprimento á Convención dos Dereitos da Infancia, que recoñece o dereito dos menores a seren escoitados nos asuntos que lles afectan.
Segundo explicou a responsable municipal, a creación deste órgano insírese na liña de traballo desenvolvida polo goberno local en materia de participación cidadá durante o actual mandato. Nese contexto, lembrou a reactivación do Consello Municipal de Maiores, a recuperación do Consello Municipal de Cooperación, a actualización do regulamento do Consello Municipal de Mocidade tras máis de dúas décadas sen revisión e o impulso de iniciativas como os Orzamentos Participativos. Rozas destacou que a infancia constitúe un colectivo prioritario para a Concellaría de Servizos Sociais e que a participación debe ser garantida do mesmo xeito que outros dereitos básicos como a educación ou a saúde.
A concelleira presentou os detalles do procedemento acompañada pola xefa de servizo de Servizos Sociais, Teresa Furelos, e por Deloga, a consultora que se encargará de dinamizar o proceso participativo que precederá á constitución do Consello.
UN PROCESO EN PARTICIPACIÓN COS CENTROS EDUCATIVOS
O Consello Municipal da Infancia terá carácter consultivo e permitirá que os nenos e nenas poidan formular propostas, expoñer preocupacións e participar no deseño de accións municipais que lles afecten de maneira directa, ao tempo que se fomenta a aprendizaxe en valores democráticos.
Para a súa creación, o Concello activará un proceso participativo no que estarán implicados todos os centros educativos de educación primaria de Santiago, as ANPAS e as entidades do terceiro sector vinculadas á infancia. A folla de ruta inclúe varias fases. A primeira será a presentación da iniciativa aos centros educativos, cunha xuntanza convocada para o 3 de febreiro. Ademais, organizaranse sesións informativas dirixidas ao profesorado e distribuirase material explicativo para as familias.
Nunha fase posterior, desenvolveranse encontros co alumnado nos propios centros co obxectivo de explicar o proxecto, incentivar a participación e recoller propostas iniciais por parte dos menores.
GRUPO IMPULSOR E APROBACIÓN PLENARIA
O proceso continuará coa creación dun grupo impulsor, integrado por nenos e nenas de entre 9 e 12 anos —correspondentes a 4º, 5º e 6º de Primaria—, que poderán incorporarse por iniciativa propia ou a proposta do profesorado, das ANPAS ou das entidades sociais. Este grupo será o encargado de definir o funcionamento do Consello, os temas a tratar e a organización das reunións, así como de elaborar o futuro regulamento, que deberá ser aprobado polo Pleno da Corporación.
A previsión municipal é que todo o proceso quede culminado coa constitución formal do Consello Municipal da Infancia antes de que remate o curso escolar. Os integrantes do grupo impulsor poderán formar parte inicialmente do órgano como conselleiros e conselleiras infantís.
Ademais de recoñecer a participación da infancia como un dereito fundamental, este novo órgano pretende promover a igualdade de oportunidades, reforzar valores como a cohesión social e a corresponsabilidade, mellorar as políticas públicas incorporando a visión dos menores e crear canles estables de colaboración entre centros educativos, familias, profesorado, entidades sociais e a administración local.
As persoas interesadas en participar no proceso ou en solicitar máis información poden contactar a través do correo electrónico conselloinfancia@santiagodecompostela.gal ou do teléfono 604 04 73 37.
