A candidata á reitoría da Universidade de Santiago de Compostela, María José López Couso, mantivo este xoves unha reunión institucional no Pazo de Raxoi coa alcaldesa de Santiago de Compostela, Goretti Sanmartín, e co concelleiro de Urbanismo, Vivenda e Cidade Histórica, Iago Lestegás. No encontro participaron tamén Pilar Murias, profesora da Facultade de Ciencias Económicas e Empresariais, e Javier Rico, profesor da Facultade de Ciencias da Educación, ambos integrantes do equipo da candidatura.
A reunión serviu para poñer o foco na necesidade de reforzar os espazos compartidos entre a cidade e a universidade, así como na apertura á cidadanía de diversos espazos da USC, incluídos inmobles de carácter singular. Segundo se trasladou durante o encontro, trátase de avanzar nun modelo no que a institución académica teña unha presenza máis visible e estruturada na vida cultural e social compostelá.
Outro dos asuntos abordados foi a colaboración estable entre o Concello e a universidade, especialmente en ámbitos como Cultura, Igualdade e Deporte. A candidata á reitoría defendeu a importancia de dotar estas relacións dun marco que garanta a súa continuidade no tempo e evite que dependan de iniciativas puntuais.
María José López Couso destacou durante a xuntanza que “se á Universidade lle vai ben á cidade vaille ben, e viceversa”, subliñando a interdependencia entre ambas institucións e a conveniencia de afondar nunha estratexia compartida para o desenvolvemento de Santiago como cidade universitaria.
No ámbito das preocupacións comúns, a alcaldesa e o concelleiro fixeron fincapé na vivenda como un elemento clave para atraer e fixar estudantado na cidade. Neste punto, López Couso sinalou que este é un dos principais retos aos que se enfronta a USC, xunto coa necesidade de manter e potenciar a súa rede de residencias universitarias. A candidata avogou por dotar esta estrutura dun financiamento propio que permita facer fronte ao deterioro das infraestruturas residenciais, unha das liñas marco recollidas no seu programa para a reitoría.
