A catedrática de Matemáticas e candidata á reitoría da Universidade de Santiago de Compostela, Rosa Crujeiras, mantivo este martes un encontro de traballo coa alcaldesa de Santiago, Goretti Sanmartín, no que abordaron diferentes propostas para institucionalizar e reforzar a colaboración estratéxica entre a universidade e a cidade. A xuntanza situou a USC como un axente activo no proxecto urbano compostelán, con capacidade para contribuír desde o coñecemento académico aos grandes debates de futuro.
Durante a reunión, Crujeiras expuxo a súa vontade de afondar no papel institucional da USC nos espazos de gobernanza e diálogo da cidade, coa participación directa da universidade na definición de políticas urbanas, patrimoniais, sociais e culturais. Segundo se trasladou no encontro, a proposta pasa por consolidar unha presenza estable da institución académica nos ámbitos de reflexión estratéxica de Santiago. Pola súa banda, a alcaldesa salientou a relevancia de contar cunha universidade implicada coa cidade e co país, que participe na construción dun modelo urbano sustentable, inclusivo e con identidade propia.
No eido do desenvolvemento económico e da innovación, ambas partes analizaron o papel da USC como motor de diversificación das bases produtivas de Santiago, a través da transferencia de coñecemento, da formación ao longo da vida e da xeración de emprego cualificado. Neste contexto, a candidata á reitoría propuxo impulsar un estudo periódico e rigoroso sobre o impacto económico da universidade na cidade, co obxectivo de cuantificar a súa contribución ao emprego, á actividade económica e ao desenvolvemento local.
A integración dos campus universitarios na planificación urbana e patrimonial foi outro dos asuntos centrais da xuntanza. Destacouse o valor do Campus Sur como parte relevante do patrimonio histórico e paisaxístico compostelán, así como a necesidade de promover actuacións conxuntas para a súa conservación, mellora e apertura á cidadanía. Estas iniciativas articularíanse en coordinación con entidades como o Consorcio de Santiago e o Real Padroado de Santiago, co fin de favorecer o uso dos espazos universitarios como ámbitos de convivencia, cultura e vida comunitaria.
En materia de cohesión social, inclusión e vivenda, o encontro permitiu identificar retos compartidos, como o acceso á vivenda do estudantado, o envellecemento da poboación ou o reforzo do tecido comunitario. Neste marco, púxose sobre a mesa a posibilidade de desenvolver programas conxuntos de convivencia interxeracional, voluntariado universitario e proxectos de aprendizaxe-servizo con enfoque social.
A reunión tamén abordou a coordinación de políticas ambientais e de mobilidade sustentable, entendendo universidade e cidade como un sistema interdependente á hora de reducir emisións, promover a economía circular e avanzar na adaptación ao cambio climático. Finalmente, destacouse a importancia de reforzar a presenza cultural e científica da USC para contribuír a unha Compostela coñecedora, viva e con memoria, máis alá do consumo, como elemento clave para o futuro compartido da cidade.
