O CiMUS da Universidade de Santiago de Compostela acolle este venres 23 de xaneiro, ás 13:00, unha conferencia centrada no desenvolvemento de copias virtuais de pacientes, coñecidas como xemelgos dixitais, e o seu potencial para mellorar a medicina personalizada, axilizar os diagnósticos e previr determinadas enfermidades, entre elas o cancro.
A sesión terá lugar no Theatre room do centro e estará impartida por Alfonso Valencia, director do departamento de Ciencias da Vida do Centro Nacional de Supercomputación de Barcelona e investigador do ICREA. O relatorio, titulado ‘From genomes to digital twins. Developments and challenges’, está aberto a toda a comunidade universitaria.
Durante a conferencia, o relator abordará os desafíos actuais da Intelixencia Artificial na medicina, así como o papel da minería de datos e das tecnoloxías da información e a comunicación no deseño de tratamentos máis personalizados, eficaces e seguros. Segundo o investigador, a combinación de grandes volumes de datos, capacidade de cálculo e software especializado permite reproducir con notable fidelidade procesos patolóxicos, facilitando o seu estudo e abordaxe clínica.
O enfoque inclúe tamén a prevención de determinados tipos de cancro e a redución do risco de recaídas mediante a análise avanzada de información biomédica. Neste contexto, Valencia sinala a necesidade de avanzar na integración de distintos niveis de modelización dixital: “Por agora os modelos que simulan as células son distintos dos que simulan os órganos, e dos que reproducen o comportamento de todo o organismo. O reto é poder integrar os tres tipos de modelo”.
