Un estudo elaborado por Lucrezia Lopez, profesora do Departamento de Xeografía e directora do Centro de Estudos e Investigacións Turísticas (CETUR) da USC, conclúe que o Camiño de Santiago reúne potencialidades e limitacións como motor de transformación rural e laboratorio de innovación social. O estudo, baixo o título ‘O Camiño de Santiago e o Renacemento do Mundo Rural: Estudo e análise das novas dinámicas e transformacións socio-territoriais’, constata que o éxito do Camiño débese á rehabilitación do patrimonio, ao apoio institucional e á promoción do turismo cultura e sustentable.
Ademais, analiza como co paso do tempo converteuse nun itinerario turístico e espiritual que dinamiza económica e socialmente os territorios rurais polos que pasa. Para a autora, nos estudos xacobeos con enfoque territorial hai unha carencia na análise das novas dinámicas e transformacións socio-territoriais que crea o Camiño, o estudo dos novos perfís de peregrinos e na adaptación dos territorios rurais a esta nova realidade.
Estas transformacións, detallou a USC nun comunicado, reflíctense en cambios demográficos, económicos e simbólicos nos espazos rurais. Por iso, a autora usa como hipótese que o Camiño actúa como axente dinamizador e responsable dun “certo Renacemento de determinas áreas rurais galegas”. “Ofrece un modelo que outros territorios rurais poderían adaptar, pero non unha fórmula simple que garanta o éxito”, matizou a autora, que remarcou que os resultados da investigación amosan que o Camiño pode actuar como motor de transformación rural.
Así mesmo, recala que o Camiño levou beneficios económicos a moitas comunidades rurais, coa creación de emprego, estimulación do investimento e oferta de alternativas aos sectores agrícolas en declive, pero por outro estes beneficios distribúense de forma desigual entre territorios e poboación. Por iso, a autora considera que o potencial como mecanismo de desenvolvemento rural “depende de enfoques de gobernación que garanta a participación comunitaria, a distribución equitativa dos beneficios e a xestión sustentable dos recursos”.
O proxecto, financiado pola Cátedra Institucional do Camiño de Santiago e das Peregrinacións, usou unha metodoloxía mixta que combina técnicas de investigación cuantitativa e cualitativa para captar tanto os procedementos obxectivos como as percepcións e representacións sociais asociados ao impacto do Camiño de Santiago no mundo rural.
