O Ateneo de Santiago celebrará este luns 12, ás 19:30, na sede de Afundación (Rúa do Vilar, 19), a mesa redonda titulada ‘Universidade e cidade’. A actividade forma parte da programación habitual dos Luns do Ateneo e reunirá ás catro candidatas ao Reitorado da Universidade de Santiago de Compostela.
No encontro participarán Rosa Crujeiras, Maite Flores, María José López Couso e Alba Nogueira, que abordarán de maneira conxunta os vínculos entre a institución universitaria e a súa contorna urbana. A sesión pretende afondar en cuestións como o impacto social da investigación, a transferencia de coñecemento, a proxección cultural da USC e o papel que a universidade desempeña na vida cotiá da cidade.
O formato de mesa redonda permitirá o contraste de propostas e visións por parte das candidatas nun espazo concibido para o diálogo, no que tamén se dará cabida á participación do público asistente. A iniciativa inscríbese nun contexto de debate previo ao proceso electoral universitario e busca achegar á cidadanía as distintas perspectivas sobre a relación entre universidade e territorio.
As participantes achegan traxectorias académicas e de xestión diversas, representativas da pluralidade de ámbitos de coñecemento presentes na USC. Rosa María Crujeiras Casais é catedrática de Estatística e directora científica do CITMAga, con experiencia investigadora internacional; María Teresa Flores Arias é catedrática de Óptica, vicepresidenta da Sociedad Española de Óptica e coordinadora do grupo Photonics4Life, cunha carreira vencellada á investigación aplicada; María José López Couso conta cunha ampla traxectoria na xestión universitaria, como decana da Facultade de Filoloxía e vicerreitora; e Alba Nogueira López é catedrática de Dereito Administrativo, especializada en dereito ambiental e dereitos lingüísticos, con presenza en órganos consultivos e redes de investigación.
