A Asociación de Veciños da Cidade Histórica FONSECA vén de publicar o sexto número da súa revista, unha edición que foi posible grazas ao programa de subvencións ás asociacións veciñais do Concello de Santiago de Compostela. A tiraxe alcanza os 400 exemplares, que se están a distribuír entre a veciñanza e os negocios do casco histórico da cidade.
A revista consta de 20 páxinas e recolle as principais preocupacións compartidas pola xunta directiva da entidade, presidida por Roberto Almuiña e integrada por José Baqueiro, Paloma Pintos, José Ángel Cocho, Cristina Bacariza, María José Lorenzo, Pastora Rivas e Jesús Varela. O número ábrese cun editorial do presidente, no que se analizan diferentes asuntos de actualidade que afectan á vida diaria no centro histórico.
Entre as cuestións abordadas figuran a finalización da concesión do aparcadoiro da Praza Galicia e a demanda social dun uso prioritario para residentes; a demora na concesión de licenzas de obras menores, os problemas cos permisos de ocupación da vía pública e o atraso na tramitación de denuncias urbanísticas. O editorial tamén pon o foco na falta de control das terrazas, cualificando de “incontrolada” a apropiación do espazo público.
Outros asuntos tratados son a non axilización das novas licenzas de taxi, a situación do contrato do servizo de autobuses urbanos, a solicitude veciñal para que Viaqua abra unha base de reparacións na Cidade Histórica, así como a persistencia de problemas relacionados co lixo e o ruído.
A reportaxe central da publicación céntrase no Conector Central, un proxecto sobre o que a Asociación anuncia a presentación de alegacións ao concurso, co obxectivo de que se teñan en conta as necesidades da veciñanza e do comercio local. Neste apartado, a entidade subliña que as rúas de San Clemente e Rodrigo de Padrón quedaron excluídas do ámbito do concurso, malia presentar problemas contrastados de mobilidade e tráfico.
A revista inclúe tamén unha comparativa entre proxectos de turismo sostible desenvolvidos en Valencia e en Santiago de Compostela. A análise sinala diversas carencias do proxecto Smartiago, que catro anos despois do seu inicio continúa sen resolver cuestións como a carga e descarga de mercadorías, o estado dos pavimentos históricos, a iluminación ornamental limitada ás fachadas da Catedral de Santiago ou outros elementos vinculados á xestión da mobilidade urbana.
O apartado de opinión complétase con dous artigos. Por unha banda, “Ordo Prophetarum (O que puido ser e non foi)”, da historiadora Mercedes Pintos, no que analiza a recuperación deste drama litúrxico e musical no Pórtico da Gloria con motivo do seu vinte aniversario. Por outra, “Emilio Cao (Milucho). In memoriam”, no que Carlos Pérez Losada lembra a figura do músico e compositor compostelán a través de vivencias persoais.
O número péchase con dúas informacións culturais: unha dedicada á publicación das acuarelas de Santiago de José Baqueiro e outra cunha entrevista á propietaria da libraría Cronopios, recentemente trasladada ao casco histórico.
