A candidata á reitoría da Universidade de Santiago de Compostela, Alba Nogueira, presentou este martes unha reclamación formal fronte á súa exclusión provisional do proceso electoral, unha decisión que considera contraria á normativa e aos principios que rexen o procedemento administrativo e electoral da institución académica.
Segundo trasladou nunha nota de prensa, a exclusión baséase en motivos formais non recollidos nas normas reguladoras, ao introducirse un deber de documentación que non figura no Regulamento electoral xeral da USC, reformado por última vez en setembro coa vista posta na convocatoria das eleccións. Para a candidata, esta esixencia supón de feito a creación dun novo requisito de elexibilidade, alleo ao marco normativo aprobado.
Nogueira sinala tamén que esta interpretación vulnera o dereito a non achegar documentos que xa están en poder da Administración, tal e como recolle a Lei de procedemento administrativo común. Ao seu xuízo, trátase dun funcionamento administrativo que dificulta innecesariamente o labor profesional das persoas que estudan e traballan na universidade.
Outro dos aspectos destacados na reclamación é a ausencia dun trámite de subsanación. Tal e como explica, entre a presentación da solicitude da candidatura e a celebración da comisión electoral central transcorreron 12 días, sen que se solicitase a corrección das supostas omisións documentais que deron lugar á inadmisión provisional.
A candidata cuestiona ademais o uso do denominado “expediente persoal”, ao considerar que non se axusta ás obrigas legais en materia de Administración electrónica, en vigor desde hai anos. Neste sentido, considera anómalo que as obrigas de relación electrónica se esixan ás persoas interesadas nos procedementos, mentres a propia Administración se afasta deses requisitos.
Na súa valoración pública, Nogueira advertiu de que a decisión adoptada xera inseguridade xurídica e desigualdade, ao tempo que supón unha interpretación restritiva do dereito fundamental ao sufraxio pasivo, polo que entende que a exclusión provisional é nula de pleno dereito.
Xunto á presentación da reclamación, a candidata quixo agradecer o apoio recibido nos últimos días por parte de membros da comunidade universitaria, que lle trasladaron mensaxes de solidariedade e tamén experiencias semellantes. Segundo indicou, estas situacións poñen de manifesto a necesidade de introducir melloras institucionais para facilitar o estudo e o traballo na Universidade de Santiago de Compostela.
