O delegado do Goberno en Galicia, Pedro Blanco, participou este mércores no acto de inicio das obras da nova sede do Centro de Supercomputación de Galicia (CESGA), un proxecto que suma 47,4 millóns de euros procedentes do Ministerio de Ciencia e Innovación a través do Plan de Recuperación. Durante o acto, afirmou que estas instalacións serán “o auténtico epicentro tecnolóxico do noso país e unha das grandes referencias da innovación en Europa”.
Blanco enmarcou esta infraestrutura como unha aposta estratéxica do Estado pola modernización e polo avance científico, asegurando que “reafirma o compromiso do Goberno coa Galicia do futuro, coa Galicia que lidera, innova e crea oportunidades para a súa xente”. Segundo indicou, a sede renovada do CESGA marcará “un antes e un despois para o desenvolvemento tecnolóxico do país”, reforzando a posición galega como un dos nodos dixitais máis relevantes de Europa, con capacidade para atraer persoal cualificado, impulsar emprego especializado e fortalecer a investigación de excelencia.
O delegado agradeceu de forma expresa o papel da ministra de Ciencia e Innovación, Diana Morant, pola súa “visión” e polo “impulso decidido” a esta infraestrutura e ao conxunto de iniciativas que o Ministerio está a promover en Galicia. Entre elas citou a Axencia Española de Intelixencia Artificial na Coruña e a futura fábrica europea de IA aplicada á saúde, proxectos que, segundo subliñou, están a situar a comunidade no mapa internacional da tecnoloxía e da innovación.
Durante a súa intervención, Blanco salientou tamén o traballo desenvolvido polo persoal do Consello Superior de Investigacións Científicas en Galicia e pola súa delegada, Carmen González. Referiuse ás “décadas de traballo rigoroso, apaixonado e esencial” que permitiron situar a investigación galega nunha posición de prestixio e puxo en valor que o CESGA se converta nunha ferramenta fundamental para continuar esa traxectoria, achegando “os mellores medios tecnolóxicos posibles para seguir investigando, innovando e mellorando a vida da xente”.
O representante estatal concluíu que Galicia está chamada a desempeñar un papel central no escenario europeo do desenvolvemento tecnolóxico grazas á colaboración institucional e á aposta por infraestruturas estratéxicas. A primeira pedra do novo CESGA, dixo, simboliza “un futuro no que Galicia lidera, avanza e gaña oportunidades” a través da ciencia e da innovación.
