O Consello do Estudantado da USC fixo público un comunicado no que anima ao alumnado a participar activamente nas eleccións a reitorado, recentemente convocadas de maneira oficial. O órgano destaca a “transcendencia” destes comicios, que serán os primeiros celebrados baixo o marco da Lei Orgánica do Sistema Universitario (LOSU) e definirán o rumbo da institución durante os vindeiros seis anos.
Segundo o Consello, a cita chega nun “momento chave” para a universidade, cunha axenda de demandas estruturais que afectan directamente á calidade de vida e á formación do alumnado. Entre as principais reivindicacións recollidas nun documento elaborado tras un proceso participativo do estudantado figuran a reparación urxente do Colexio Maior de San Clemente, o aumento das prazas públicas de aloxamento, e a regulación dos alugueiros temporais nun contexto de forte presión inmobiliaria en Santiago.
Outros eixos de actuación que o Consello pide á futura reitora abordar son a creación dunha Oficina de Diversidade independente, a mellora da Unidade de Atención Psicolóxica, o recoñecemento de baixas académicas xustificadas sen penalización, e a ampliación dos horarios das bibliotecas, así como unha aposta decidida pola mobilidade, especialmente no campus de Lugo. Tamén se solicita a revisión da normativa de permanencia e a implantación dun sistema de aprobado por compensación, ausente actualmente na USC.
O Consello lembra que o sector estudantil, cun peso do 28% no cómputo global, pode desempeñar un papel determinante ante a previsión de cinco candidaturas procedentes de distintos ámbitos do Persoal Docente e Investigador. Esta fragmentación do voto, xunto ao sistema electoral a dúas voltas, podería outorgar ao alumnado a capacidade de “desequilibrar a balanza” no resultado final. Para favorecer un voto “consciente e informado”, o Consello porá en marcha un plan de acción con debates entre as candidaturas, difusión comparada dos programas electorais e campañas informativas tanto en campus como en redes sociais.
FOMENTO DA IGUALDADE, PROMOCIÓN DA CULTURA E MELLORA DE SERVIZOS
Por outra banda, o estudantado, a través dun documento publicado polo Consello do Estudantado, recolle “demandas urxentes e estruturais que deberá abordar” quen acabe ocupando o posto. O fomento da igualdade, a promoción da cultura e a mellora dos servizos aos alumnos son os aspectos que máis preocupan aos estudantes. Solicitan que se constitúa unha oficina de Diversidade, independente á de Igualdade, que conte cunha delegada propia.
O respecto a colectivos minoritarios tamén aparece plasmado entre as súas demandas. Reclaman “xornadas formativas en antirracismo e identidades trans”, ademais dunha maior protección ao estudiantado internacional por parte da Oficina de Mobilidade. O Consello, á súa vez, considera que os 35.000 euros adicados a programas de dinamización son “insuficientes”. É por iso polo que instan ao novo reitor ou reitora a aumentar o investimento en cultura, a potenciar os programas de danza e teatro, e a realizar máis actividades en colaboración cos concellos.
Respecto da cultura, tamén solicitan un maior fomento da lingua galega. Para iso, reivindican que se impulse a docencia en galego, que o Centro de Linguas Modernas (CLM) oferte mellores horarios para os cursos de galego e que o Servizo de Normalización Lingüistica cre “dicionarios de termos específicos” en galego. Non só defenden a promoción do galego, senón de calquera outro idioma ou curso presentado polo CLM. Propoñen que os alumnos que se matriculen a calquera deses ensinos gocen de descontos na súa matrícula.
En materia de servizos ao estudiantado, resaltan as demandas acerca dunha maior flexibilidade avaliatoria. Demandan, para iso, que o sistema de avaliación continua sexa modificable cando o alumno non poida asistir por motivos xustificados e que se establezan mecanismos de suspensión temporal da matrícula sen penalización económica por causas de forza maior. As demandas publicadas polo Consello do Estudantado viran, tamén, desde a problemática da vivenda á mellora dos programas de mobilidade ofertados pola USC.
Sobre a vivenda, solicitan que se rematen as reparacións da residencia de San Clemente e que se ofrezan máis prazas públicas. Ademais, consideran que a universidade debe “avogar pola declaración de Santiago como zona tensionada”. Manter o horario das bibliotecas en período de exames, a contratación de máis persoal de limpeza e que se garanta a existencia de espazos autogestionados polos estudantes, son as principais obxeccións do Consello en materia de infraestruturas.
Sobre os programas de mobilidade, desde o Consello esixen que se “mellore a comunicación cos estudantes de Erasmus”. Á súa vez, piden que se garanta que os pagos aos alumnos de Erasmus se envíen antes do inicio do programa. O Consello do Estudantado insta tamén á USC a que, no seu papel como entidade pública, loite para que o Campus de Lugo goce dunha mellor comunicación co resto de cidades galegas e porque se “acabe coa cátedra de mobilidade de MONBUS”.
