O Ateneo de Santiago organiza este martes, 4 de novembro, ás 19:30, un novo faladoiro titulado ‘Cidadanía e turismo’ no Salón de Actos Isaac Díaz Pardo (Praza de Salvador Parga, 4-2º). No encontro participarán Xosé Santos Solla, catedrático de Xeografía Humana da USC; Ángel Panero, arquitecto, e Francisco Candela, economista e presidente do Ateneo.
A sesión nace da preocupación polo rumbo que tomou o turismo en Santiago nas últimas décadas, cunha transformación visible do seu casco histórico. A substitución de vivendas habituais e do comercio tradicional por negocios ligados ao turismo, segundo recoñece a entidade, evidencia “a necesidade de repensar o equilibrio entre a vida cidadá e a actividade turística”.
O Ateneo pretende con este faladoiro abrir un espazo de debate e proposta que permita reflexionar sobre accións concretas para unha xestión turística integrada na planificación urbana e social. A institución compostelá aspira a que este diálogo sexa “plural e informado”, implicando tanto ás administracións públicas como a entidades privadas e colectivos veciñais na procura dun modelo de cidade sustentable e habitable que poña no centro ás persoas que viven en Santiago.
