A Xunta de Goberno Local de Santiago deu luz verde este luns ao proxecto de mellora da drenaxe na avenida do Cruceiro da Coruña, cun orzamento de 66.257,26 euros e un prazo de execución de dous meses. A actuación afectará a uns 600 metros cadrados, entre os números 185 e 191 da vía.
Segundo explicou a portavoz do Goberno local, Míriam Louzao, trátase dunha intervención “puntual e urxente” que busca corrixir os problemas derivados do desgaste do firme e do deterioro dos elementos de drenaxe superficial. Esta actuación enmárcase como primeiro paso dun proxecto máis amplo que o Concello ten previsto desenvolver na mesma rúa nos próximos meses.
Ademais deste punto, o Goberno local abordou outros asuntos na súa sesión ordinaria. Entre eles, a adxudicación á empresa Sihaho Consulting SLU do servizo de execución dunha campaña de promoción, formación, difusión e seguimento da compostaxe de biorresiduos, financiada polo Plan de Recuperación, Transformación e Resiliencia (PRTR).
Tamén se autorizou o expediente para licitar o servizo de análise de mostras e emisión de informes das probas de detección de drogas recollidas nos supostos previstos pola Lei de Seguridade Viaria, cun orzamento de 26.136 euros e unha duración de dous anos.
Por último, o Goberno local deu o visto e prace ao expediente para contratar a subministración de tres lotes de vehículos para o parque móbil municipal: un vehículo tipo SUV ou turismo eléctrico ou híbrido, tres turismos eléctricos ou híbridos adicionais e unha furgoneta tamén de baixas emisións, co obxectivo de renovar e avanzar na transición ecolóxica da frota municipal.
