A Asociación Española Contra o Cancro convocou este martes á cidadanía a participar na cuarta edición da camiñada ‘Santiago de Compostela Contra o Cancro’, o día 27 deste mes, a partir das 10.00 horas, na Alameda compostelá.
O vicepresidente provincial da Asociación Española Contra o Cancro, Carlos Lamora, reforzou a invitación a todos os interesados en participar no percorrido de 5 quilómetros durante unha rolda de prensa na sede da asociación en Santiago.
“O obxectivo é visibilizar a asociación e ofertar todos os nosos servizos que son gratuítos e, ademais, que toda a veciñanza decátese da importancia da investigación”, explicou Lamora. Tamén destacou o labor de 2.300 investigadores que reciben apoio da asociación en 146 centros en España.
Tamén asistiu ao acto a alcaldesa de Santiago, Goretti Sanmartín, quen instou a que as administracións unan forzas para combater a enfermidade. Ademais, recalcou os datos achegados pola asociación sobre a incidencia de cancro na sociedade.
“A administración local, galega e estatal, todos teñen que estar en colaboración.(…) É que os datos son estremecedores: un de cada dous homes e unha de cada tres mulleres terá cancro. Pero temos que ver a parte positiva: coñeceremos a estas persoas, estaremos con elas e elas terán unha longa vida”, afirmou a alcaldesa.
Así mesmo, Sanmartín asegurou que desde o concello seguirán dando apoio e comprometidos coa causa. “Santiago de Compostela tamén é un concello solidario, unha cidade que sempre está, e que todo o mundo veña o día 27”, finalizou.
