O 25 de abril de 2024 foi unha data sinalada para a cidade compostelá, que acolleu a celebración dos 50 anos da Revolução dos Cravos. Entre os actos que tiveron lugar arredor desta data destacaron unha xornada na Facultade de Filoloxía da USC, coa presenza de Rui Pato; o habitual cántico do Grândola Vila Morena na Praza da Música en Compostela, sita no Burgo das Nacións, e un concerto organizado pola Associação José Afonso no Teatro Principal.
Este concerto, que tamén rematou co Grândola, contou coas actuacións do dúo luso-brasileiro Couple Coffee, conformado por Luanda Cozetti e Norton Daiello; Nacho Muñoz, Faia Díaz e Lar Legido, que interpretaron a Zeca Afonso dende visión transgresora e contemporánea, e Nara e Manuel, o dúo compostelán formado por Aldara Palmeiro e Manuel Lucas.
