O concelleiro de Urbanismo do Concello de Santiago, Iago Lestegás, avanzou que presentará o recurso de reposición para retrotraer a declaración de zona de mercado residencial tensionado esta semana.
Preguntado polos medios de comunicación este mércores tras a reunión entre técnicos da Xunta e o Concello do pasado luns, Lestegás insistiu en que o Instituto Galego da Vivenda e Chan (IGVS) “recoñeceu a validez do diagnóstico” e “que Santiago cumpre os requisitos para ser declarado zona de mercado residencial tensionado”.
No entanto, Raxoi accedeu a adaptar a documentación a “as súas esixencias”, eliminando os datos que eles non queren que figuren — e deixando os datos oficiais — e incorporando outros que esixen, “aínda que non sexan legalmente obrigatorios”.
Ademais, concretarán “máis” algunhas medidas propostas, aínda que puntualizou Lestegás, “á Xunta non lle corresponde opinar sobre o plan de medidas porque o plan o fai e apróbao o Concello porque así o decidiu no seu momento o Partido Popular cando aprobou a Lei de Medidas Fiscais Administrativas de 2023″.
En canto ao prazo para realizar as ditas adaptacións, Lestegás sinalou que é un traballo que teñen que facer en paralelo a “moitas outras cousas”. “Todo este traballo que a Xunta nos está obrigando a facer extra, provoca que non podamos dedicar ese tempo no Concello a outros asuntos que tamén son importantes”, explica.
Durante a súa intervención, tamén defendeu a utilización de datos non oficiais xunto aos oficiais porque “permiten facer unha triangulación”. “Esas medidas de contención de prezos operan sobre o mercado privado. Por tanto, coñecer a información que ten o mercado sobre as dinámicas residenciais non é menor”, ampliou o concelleiro. Con todo, finalizou asegurando que “como queren que o procedemento avance”, e póidase regular o prezo de vivenda, “farán todas as adaptacións que sexa necesario facer”.
