A Festa para as Persoas Maiores celebra este ano a súa 25ª edición, coincidindo coas vodas de prata dunha das citas máis queridas e veteranas das festas da Ascensión. O encontro terá lugar este venres 30 de maio ás 14:00 no recinto feiral de Amio, e ofrecerá un xantar de confraternidade amenizado polas actuacións musicais de Grupo Alma Latina e Ruth Cundíns. As entradas, a 10 euros por persoa, poden adquirirse ata o venres pola mañá no despacho do Teatro Principal, en horario de 10:00 a 13:00.

Xunto con este tradicional xantar, outra das actividades senlleiras da programación é o Torneo de Chave, que nesta ocasión acada a súa 48ª edición. A final disputarase o sábado 31 de maio, a partir das 17:00 horas, na Alameda, fronte á escola infantil de Santa Susana. O torneo reúne cada ano a parellas de xogadores e xogadoras que compiten neste xogo de lanzamento tan enraizado na cultura popular galega.

As actividades comezan xa o xoves 30 coa animación dos cabezudos, que sairán en comparsa dende as 12:30 horas para percorrer a zona vella de Santiago. Será o inicio dun fin de semana no que o programa da Ascensión ofrecerá propostas para públicos de todas as idades.

O sábado 31 terá tamén un marcado acento automobilístico co Fastlife Expomotor, unha exposición de vehículos clásicos e actuais que se celebrará desde as 11:00 horas. Inclúe un espectáculo de vinilado ás 16.00 h., un curso de iniciación ao detallado automotriz ás 18:00 e, para pechar, o anuncio dos gañadores do certame ás 20:00.

Tamén o sábado, a partir das 19:30 horas, a rúa Travesa será escenario de Raíces na pedra, un acto de homenaxe ás mulleres tocadoras da tradición. Esta proposta cultural serve como recoñecemento ás figuras celebradas no Día das Letras Galegas 2025, dedicado á memoria e legado das mulleres na música tradicional.

Xa pola noite, ás 20:30 horas, o Auditorio de Galicia acollerá a representación teatral de ‘Poncia’, protagonizada por Lolita Flores. As entradas están á venda na zona C, na praza de Cervantes, en horario de 11:00 a 14:00 e de 16:00 a 19:00 horas.

O peche do fin de semana correrá a cargo da compañía Pistacatro, que presentará o seu espectáculo Circo Sen Patrón o domingo 1 de xuño, a partir das 19:00 horas, na praza de Mazarelos, incorporando así tamén o mundo do circo á oferta das festas compostelás.