Unha extraballadora da gardaría pública Galiña Azul do Polígono do Tambre, en Santiago de Compostela, aceptou unha pena de 15 meses de cárcere por un delito de malos tratos habituais a menores entre os anos 2018 e 2019. Tal e como confirman a Europa Press fontes xudiciais, a educadora alcanzou un pacto de conformidade coa Fiscalía e as familias querellantes na vista celebrada no Xulgado do Penal número 2 da capital galega.
Á parte da pena de cárcere, que quedará suspendida –por tanto, non entrará en prisión– a condición de que non delinca durante dous anos, foi condenada a indemnizar en 1.000 euros a un menor e 1.500 a cada un dos outros dous. Ademais, estará inhabilitada durante dous anos para exercer oficio, profesión ou outra actividade que implique contacto con menores e deberá pagar dúas multas, de 150 euros cada unha, por delitos leves de malos tratos de obra e lesións.
Fontes da Consellería de Política Social e Igualdade consultadas por Europa Press aseguran que, “axiña que” tiveron coñecemento das condutas da traballadora, en outubro de 2019, “abriuse un expediente e fíxose unha reunión coas familias” do centro público. Así, mentres se realizaba a investigación, esta educadora foi apartada e, posteriormente, ela mesma colleu unha baixa.
Xa en decembro daquel ano abríronse dilixencias previas por parte do xulgado, polo que a Xunta remitiu “toda a documentación” relativa ao expediente sancionador. Con todo, este trámite suspendeuse desde o momento no que se xudicializaron os feitos, ata que finalmente decaeu no momento en que a traballadora renunciou ao seu posto de traballo en abril de 2020, relatan as mesmas fontes.
