O goberno de Santiago cargou este xoves contra “a rabecha” da Xunta, que anunciou que deixará en suspenso o tramo da senda que afectaba o Bosque de Conxo e que destinará os fondos a outra actuación de mobilidade “sustentable” noutro municipio, á vez que urxiu explicacións ao portavoz local do PP, Borja Verea.
Nunha rolda de prensa para presentar o 30 aniversario da Asociación do Traxe, a portavoz do goberno municipal e concelleira de Capital Cultural, Miriam Louzao, aludiu ao informe desfavorable que transcendeu na pasada xornada e que subscribiu a anterior secretaria xeral de Patrimonio Cultural Carmen Martínez Insua o mesmo día no que se aprobou o seu cesamento.
“Rexeita o trazado alternativo e deixa claro que a primeira alternativa afectaba aínda máis, que é unha cuestión bastante relevante. Un organismo da propia Xunta confirma o dano patrimonial e natural á zona, tal e como viñan defendendo o Concello, que, como sabedes fixo alegacións, e os veciños”, indicou.
“A Xunta decidiu no seu momento dedicar 13 millóns de fondos europeos a un capricho de Borja Verea”, censurou, antes de afirmar que, agora, “queda claro que a senda non foi ben planificada e agora hai risco de perder eses fondos europeos”.
Sobre as manifestacións da Consellería que se ocupa de asuntos de mobilidade sobre destinar os fondos a outro municipio, esgrimiu que “soa claramente a unha rabecha”. “Estamos a esperar as palabras de Borja Verea”, remarcou, antes de salientar que o líder local do PP “presumiu de ser o conseguidor deste proxecto”.
“Pois agora estamos ansiosas por saber que explicacións dá agora a toda esta situación, apostilou, antes de subliñar que debería explicar “se lle parece ben que eses fondos agora leven a outro municipio” cando o escenario deriva, insistiu, “dunha planificación equivocada desde o principio”.
E en canto ás dúbidas expostas polos veciños que se mobilizaron contra a senda sobre se sería legal destinar fondos europeos que estaban proxectados para esta actuación a unha distinta noutro municipio, replicou que comparte que “hai unha dúbida”. En todo caso, insistiu en que a lectura apunta “a rabecha, a un certo desquite”, que reprobou.
A FAVOR DA MOBILIDADE SUSTENTABLE, PERO “NON A CALQUERA CUSTO”
Sobre este asunto tamén foi preguntado o concelleiro de Urbanismo en Raxoi, Iago Lestegás, ao comezo da segunda reunión da mesa sectorial de vivenda, e lembrou que o goberno municipal dixo “desde o principio” que este proxecto “non era compatible con preservar” valores patrimoniais e naturais da zona afectada.
Ademais, defendeu que o goberno que dirixe Goretti Sanmartín está “a favor” das infraestruturas de mobilidade sustentable, pero “non a calquera custo”. O desta actuación, agregou, era “excesivo”. “É unha infraestrutura mal planificada. Iso ten consecuencias e a Xunta terá que dar explicacións”, resolveu.
ANA PONTÓN
A portavoz nacional do BNG, Ana Pontón, criticou que a Xunta se comporte “como un neno pequeno cun berrinche” ao ameazar con dar a outro municipio os fondos da senda suspendida que afectaba o bosque de Conxo en lugar de buscar outra alternativa.
Preguntada respecto diso nunha rolda de prensa, Pontón sostivo que “se hai unha afección patrimonial” o que se debe é “buscar unha alternativa”, que “é o que se lle pediu desde o primeiro momento e non unha actitude infantil e que non se entende no funcionamento dunha administración”.
“O que lle pido á Xunta é seriedade, que recoñeza que se fixeron mal as cousas e que non se pode pasar por encima de todo”, afirmou Pontón despois de que na xornada do mércores a Xunta anunciase que, ante a “oposición” do goberno local de Santiago, deixará en suspenso o tramo do eixo de mobilidade sustentable entre Milladoiro e a estación intermodal “ao seu paso polo Banquete de Conxo”, dando continuidade ao itinerario ciclista en execución a través da Rúa Benéfica e Ramón Baltar.
