O ministro de Transportes e Mobilidade Sustentable, Óscar Puente, anunciou que os descontos nas peaxes da autoestrada AP-53, que une Lalín e Santiago de Compostela, activaranse esta semana. “Con estas bonificacións, un vehículo lixeiro que use a autovía todos os días poderá aforrarse 315 euros e un camión de catro eixos ata 420 ao mes“, sinalou o ministro nunha mensaxe publicada no seu perfil da rede social ‘X’ na xornada na que o Consello de Ministros aproba o decreto con esta medida.
Sobre este asunto e en declaracións remitidas aos medios, o secretario xeral do PSdeG, José Ramón Gómez Besteiro, lembrou que esta autoestrada foi “durante máis de dúas décadas unha das máis caras de España, sen descontos, sen alternativas e esquecida polos gobernos do PP”. “Hoxe, grazas aos socialistas, isto cambia”, sinalou para pór en valor que o Goberno de Pedro Sánchez poña en marcha “os primeiros descontos da historia nesta vía”.
Así, indicou que as viaxes de volta serán gratuítas e que haberá rebaixas desde ata o 75 % para os usuarios frecuentes, así como bonificacións para os camións. “Un alivio real para as familias, para os traballadores, para quen máis o necesita. Grazas aos socialistas, por fin, a AP-53 deixa de ser unha inxustiza”, destacou.
