Os grupos municipais do Concello de Santiago de Compostela emitiron unha declaración conxunta na que reiteran a necesidade de crear un Xulgado de Violencia sobre as Mulleres na cidade, en liña co acordo plenario aprobado por unanimidade o 25 de marzo de 2021.
A corporación municipal subliña que a Lei Orgánica 1/2004, de medidas de protección integral contra a violencia de xénero, xa recollía a importancia da especialización na tramitación das denuncias por violencia machista. Así mesmo, o Pacto de Estado contra a Violencia de Xénero, na súa medida 122, tamén recomenda o reforzo da especialización nos xulgados do penal, ao ser os que xestionan un maior volume de casos desta natureza.
O Tribunal Superior de Xustiza de Galicia (TSXG), na súa reunión do pasado 24 de xaneiro de 2025, incluíu a creación deste xulgado como a súa primeira prioridade dentro da proposta de novas unidades xudiciais en Galicia. Esta decisión baséase tamén no acordo alcanzado o 30 de maio de 2024 entre o TSXG e a Xunta de Galicia.
Segundo se recolle no comunicado, a corporación municipal compostelá coñece, a través dos medios de comunicación, que o Goberno do Estado estuda a posibilidade de reconverter algún xulgado de instrución en Santiago para especializalo en violencia de xénero. Con todo, o Concello insiste en que a creación dun xulgado exclusivo para esta materia non debe supoñer a eliminación doutras unidades xudiciais xa existentes.
Desta maneira, o Concello de Santiago reitera o seu apoio á petición formulada polo TSXG, insistindo en que a cidade, como capital de Galicia, debe contar cun órgano específico para abordar a violencia contra as mulleres con maior eficacia e especialización.
