O concelleiro do PP de Santiago José Ramón de la Fuente manifestou este martes en rolda de prensa a súa “perplexidade” polo estado “indolente, opaco e caótico” no que, ao seu xuízo, atópase a xestión dos centros socioculturais de Compostela, á vez que urxiu a licitación dos novos contratos.
“Ante unha situación que dura xa dous anos, reclamámoslle ao goberno local que proceda a licitar, de forma inmediata, os novos contratos e solicitámoslle que remita á oposición os informes técnicos, xurídicos e económicos que figuran neste expediente de contratación”, demandou.
De la Fuente remarcou que “é necesario que se lle garantan aos traballadores destes centros o mantemento das súas condicións de traballo; as actividades nos mesmos; e que se controle a execución do contrato de limpeza”.
“Se facemos un percorrido desde o inicio do mandato só atopamos falsas verdades e incompetencias. Xa en maio 2024 o concelleiro responsable dos centros socioculturais comprometeuse a ter presentados os pregos e en marcha a licitación do catro contratos dos mesmos, pero, en setembro, os populares vímonos no deber de denunciar a situación límite na que estaban devanditos centros que seguían sen contratos”, queixouse.
Segundo apuntou, o mes de novembro pasado, unha das empresas, farta de esperar a prometida licitación, solicitou, “formalmente e por escrito, a rescisión do contrato”; e os traballadores “denunciaban a falta de pagamento das súas nóminas, anunciando que en xaneiro de 2025 a empresa deixaba de prestar os servizos e, por tanto, procedería á rescisión dos seus contratos”.
“MÁIS DUN ANO PARA PREPARAR O EXPEDIENTE”
“O goberno tivo máis dun ano para preparar o expediente, abrir a fase de adxudicación e adxudicar os contratos, pero, unha vez máis, volveu mentir, porque cando estamos xa en marzo de 2025 todo apunta a que resulta xa imposible que haxa contratos novos ao final dos actuais, porque, ata o momento, non se completou o expediente de contratación, non se publicaron os pregos e non se abriu a fase de adxudicación”, agregou o edil.
Tras incidir en que os servizos se prestan agora mesmo “coas empresas querendo deixar os contratos”, apuntou que a rexedora, Goretti Sanmartín (BNG), decidiu “delegar a xestión deste departamento en Compostela Aberta” e, tras lamentar como levaron os mesmos durante a etapa na que CA dirixiu o goberno local, concluíu que agora viven “a segunda etapa negra”. “E a alcaldesa é responsable directa”, resolveu.
