As concelleiras compostelás Mercedes Rosón e Mila Castro agradeceron este xoves o apoio da cidadanía tras coñecerse que o manifesto feito público a pasada semana para mostrar o respaldo ao catro edís expulsados do PSOE acumula xa máis de 600 firmas.
Nun comunicado remitido aos medios, Rosón mostrouse “agradecida e emocionada” polas mensaxes recibidas por “xente querida e respectada” por eles.
Ademais, puxo en valor a “valentía” dalgunhas persoas que “dan un paso á fronte” ao asinar ese escrito para “alzar a voz ante esta situación” que cualifican de “inxusta”.
A concelleira insistiu en que esta situación “non se pode xustificar en incumprimento de ningún tipo” e defende que “quen usa ese argumento, sabe que falta á verdade”.
Pola súa banda, Mila Castro agradeceu “aos centos de veciños e veciñas anónimos” que trasladaron o seu apoio aos edís ao “atreverse a pór o seu nome á beira” do deles. Neste sentido, sinalou que a resposta será “seguir traballando con lealdade, coherencia e responsabilidade”.
Precisamente, noutro comunicado remitido aos medios, os impulsores da carta en apoio aos edís destacaron que en menos de 24 horas asinaron o texto máis de 100 novas persoas, ata as 640.
Entre os novos apoios destacan o histórico socialista Francisco Cerviño González ‘Tuco Cerviño’, o exconcelleiro Andrés Fariña, a secretaria xeral do PSOE de Teo, Mayte Argibay Silva, así como o exsenador Miguel Bautista Carballo e o exalcalde de Cedeira, José L. Vergara Rey, entre outros.
