A portavoz municipal do Goberno local de Santiago, Míriam Louzao, confirmou este luns en rolda de prensa que o Concello traballará de forma coordinada con Aena para que o impacto do peche do aeroporto de Lavacolla, previsto entre abril e maio de 2026, sexa ‘o menor posible’. O obxectivo, segundo Louzao, é facilitar que os turistas ‘poidan chegar a Compostela desde os outros aeroportos’ durante os 35 días de peche da terminal compostelá.
A obra, que inclúe a renovación do pavimento da pista e a mellora dos sistemas de aterraxe con baixa visibilidade, está valorada en 31,6 millóns de euros. Míriam Louzao subliñou que o proxecto é ‘moi importante para que o aeroporto quede en condicións óptimas de face ao ano 2027’ e insistiu en que se traballa xa en coordinación co director da terminal compostelá para deseñar un plan de actuación que permita mitigar os efectos deste peche temporal.
GRATUIDADE DA AP-9
Ademais, a portavoz municipal referiuse á reunión convocada pola alcaldesa Goretti Sanmartín para o próximo 7 de marzo no Pazo de Raxoi, coa intención de impulsar unha postura conxunta a favor da gratuidade da AP-9. Louzao indicou que ‘moitos concellos amosaron o seu interese en asistir’ e destacou a importancia de manter unha ‘postura de país’ para evitar ‘accións localistas’.
‘Galicia é o lugar do Estado que máis peaxes paga, polo que entendemos que ten que haber unha postura conxunta a favor da gratuidade da AP-9’, afirmou Louzao. Tamén deixou aberta a posibilidade de que a reunión se realice coa colaboración da Fegamp ou doutras institucións, sempre que se manteña o obxectivo de alcanzar un acordo colectivo.
FORMACIÓN DE MEDICINA EN SANTIAGO
Por outra banda, Louzao foi cuestionada sobre o proceso iniciado pola Consellería de Sanidade para avaliar a posibilidade de que parte do grao de Medicina se imparta nas áreas sanitarias de Vigo e A Coruña. A portavoz municipal manifestou que o Concello escoitará a opinión da USC e prestará o seu apoio á institución universitaria na decisión que tome respecto a esta proposta.
