Representantes de Compostela por Palestina formalizaron a entrega de máis de 1.500 firmas dirixidas ao Goberno para esixir unha solución negociada ao conflito e “o fin do comercio de armas con Israel” por parte de España.

Foi cunha concentración previa ante a Delegación do Goberno en Galicia e con posterior entrega de firmas na Subdelegación, precisou Miguel Fernández, portavoz dun colectivo integrado por distintas entidades e asociacións que reclaman un “proceso de diálogo para garantir o fin da ocupación”.

“Constituímonos por mor da situación de guerra e iniciamos a recollida de firmas“, apuntou o seu portavoz, que insistiu que, entre as súas demandas, está que haxa corredores humanitarios para facilitar os recursos básicos á poboación pero tamén que se acometan outras actuacións.

“Un alto ao fogo inmediato que agora é provisional e un proceso de paz xusto e garantista co pobo palestino, o cesamento do asedio a territorios palestinos e unha solución pacífica e negociada baseada no dereito internacional, con dereito de retorno dos palestinos”, explicou.