O concelleiro de Facenda e Orzamentos do Concello de Santiago, Manuel César Vila, avanzou que o Goberno local negocia os orzamentos co grupo municipal socialista sobre un borrador que rolda os 144 millóns de euros.
En rolda de prensa este luns, o edil sinalou que a semana pasada presentaron este borrador ao PSOE. En concreto, trátase dun documento que, “con gastos e ingresos”, é “parecido ao do ano pasado”. “Rolda os 144 millóns de euros, con 129 millóns en gasto corrente para partidas de gastos de persoal, gastos e servizos correntes, pago de juros e transferencias correntes cun esforzo investidor que rolda os 12 millóns de euros”, explicou.
Un “esforzo” que, segundo o concelleiro, complementarán con “un expediente de modificación de crédito, dando de baixa proxectos que viñan de anos anteriores para financiar máis dun millón de euros en investimentos no capítulo V”.
Ademais, Manuel César detallou que o borrador presentado ao grupo municipal socialista non inclúe “subida de impostos”, aínda que si recolle “un incremento na recadación como consecuencia de mellorar a eficiencia na xestión de recadación a través do cruzamento de datos e no servizo de inspección tributaria do concello”.
Tamén lembrou que no plan normativo presentado este luns vai “a nova ordenanza fiscal do lixo” para adecuar os ingresos “coa prestación do servizo” e adaptala “á subida do canon de Sogama”. “É unha subida que vén imposta pola Xunta e que supón un incremento importantísimo do que sería esta prestación do servizo”, expuxo.
En relación coa taxa turística, o concelleiro de Facenda lembrou que a Xunta debe aprobar unha lei autonómica que permitirá “avanzar nunha ordenanza fiscal”, así como na súa xestión, insistindo en que ao tratarse dun imposto autonómico “o lóxico sería que fose xestionado pola Atriga”.
Neste sentido, afirmou que “é imposible” redactar unha ordenanza municipal “sen ter unha lei aprobada”. “Isto atrásanos moito os traballos”, lamentou.
En canto á débeda que, asegurou, van asumir, “baixa a un préstamo bancario de 2.300.000 millóns”. “Estamos nunha senda de ir reducindo a débeda”, relatou o responsable local.
NEGOCIACIÓNS PSOE
Preguntado polas negociacións dos orzamentos co grupo municipal socialista, Manuel César Vila destacou que o Goberno local está “esperanzado” con que os socialistas “asuman a súa responsabilidade cos veciños” e con “os grandes proxectos do concello”.
“Desde o goberno bipartito non nos adoitamos situar sobre o que ocorre noutras organizacións políticas”, aseverou cuestionado polas diferenzas entre o grupo municipal e a dirección local do PSOE.
