Ángel Minguillón, residente de cuarto ano do servizo de Neurología da área Sanitaria de Santiago de Compostela e Barbanza, foi un dos gañadores dos XXXIV Premios á Investigación Mutual Médica 2024, recentemente entregado no Centro Cultural de Barcelona.
Trátase duns galardóns que, en tres categorías, concede a Fundación Mutual Médica a través do seu programa ‘Impulsar(me)’ para recoñecer o labor de médicos en exercicio, residentes e estudantes no impulso de novas vías de investigación en torno ao desenvolvemento de terapias innovadoras, ferramentas diagnósticas ou o coidado e tratamento de enfermidades.
Xunto aos primeiros gañadores, o proxecto ‘Biomarcadores centrados en proteína Tau na enfermidade de Alzheimer de inicio precoz’, presentado por Anxo Manuel Minguillón Pereiro, MIR de neurólogo no Complexo Hospitalario Universitario de Santiago de Compostela, foi recoñecido cun dos accésits da Bolsa Mutual Médica, dotado con 5.000 euros.
O estudo compostelán desenvolverase en pacientes con enfermidade de Alzhéimer de inicio precoz (menos de 65 anos ao diagnóstico), recrutando prospectivamente unha cohorte destas características nesta área sanitaria de entre 40 e 60 enfermos. Obteranse varios biomarcadores destes enfermos, tanto en líquido (plasma, sangue e líquido cefalorraquídeo) como de imaxe (resonancia de alta resolución e imaxe metabólica).
Tal e como subliña o doutor Minguillón, “dito estudo busca poder empregar, coa mesma fiabilidade, métodos de diagnóstico menos invasivos que a punción lumbar, ademais de analizar como se comporta a proteína Tau (unha das principais implicadas no Alzhéimer) nestes pacientes, correlacionando clínica e biomarcadores líquidos e de imaxe estrutural e metabólica”. O tempo estimado para o desenvolvemento deste estudo é de 2-3 anos.
