A concelleira de Turismo de Santiago, Miriam Louzao, reafirmou este luns a posicion do goberno local compostelán acerca da afectación que as vivendas de uso turístico (VUT) teñen no mercado da vivenda de aluguer, algo que ve “claro”.
Así o dixo despois de que a conselleira de Vivenda e Planificación de Infraestruturas, María Martínez Allegue, negase este domingo, nunha entrevista na Cadea Ser, que en Galicia se estea tensionando o prezo do aluguer polas vivendas de uso turístico.
“Entender que 1.000 vivendas retiradas do mercado de aluguer non teñen unha afectacion sobre a oferta é algo que nos parece que cae polo seu propio peso”, dixo Louzao. “Claro que afecta”, engadiu.
A concelleira lembrou que existen “múltiples estudos por todo o mundo” que indican que as vivendas de uso turístico “están a ter unha afectación real no mercado do aluguer”, dixo, polo que afirmou “non compartir” a “percepción” da conselleira.
