A Universidade de Santiago de Compostela abriu este mércores Virtus, unha plataforma tecnolóxica situada na Facultade de Ciencias da Comunicación que se presenta como un espazo de solucións virtuais avanzadas. Este novo recurso permitirá aos grupos de investigación e axentes sociais desenvolver proxectos de forma colaborativa e multidisciplinar, aproveitando as tecnoloxías de realidade virtual e mixta.
Virtus nace froito do traballo do Grupo de Estudos Audiovisuais (GEA) da USC, e ten como núcleo tecnolóxico un Estudio Virtual de Televisión de última xeración recentemente instalado na facultade. O obxectivo desta infraestrutura é converterse nun centro de creación de contidos en realidades virtual e mixta, facilitando a súa integración na investigación universitaria e ofrecendo novas ferramentas para a innovación docente.
Ademais de permitir a gravación de contidos audiovisuais para a divulgación do coñecemento científico, Virtus ofrecerá a posibilidade de participar remotamente en eventos científicos a través de contornas 3D, integrando cámaras e contidos dixitais en tempo real. Desta forma, busca facilitar a transferencia do coñecemento científico xerado na USC ao tecido TIC e audiovisual galego.
A presentación oficial tivo lugar durante a xornada ‘Portas a Virtus’, presidida polo reitor da USC, Antonio López, e coa participación da decana da Facultade de Ciencias da Comunicación, Ana Isabel Rodríguez, entre outras autoridades académicas.
