A Real Academia Galega de Ciencias (RAGC) segue cos actos de homenaxe ao matemático José Rodríguez González, recoñecido como o ‘Científico Galego 2024’. Este luns, 16 de outubro, ás 12:00 horas, terá lugar a colocación dunha placa conmemorativa no Parque das Ciencias de Santiago de Compostela, onde a Academia xa ten homenaxeado a outros científicos e científicas galegas.
O acto contará coa presenza da alcaldesa de Santiago, Goretti Sanmartín, así como co presidente da RAGC, Juan Lema, entre outras personalidades do ámbito político, social e cultural. Durante a homenaxe, destacarase a contribución de Rodríguez ao coñecemento científico en Galicia e a súa relevancia histórica tanto no eido das matemáticas como noutros campos como a xeometría, astronomía, xeografía e mineraloxía.
José Rodríguez, nado en Lalín en 1770 e falecido en Santiago de Compostela en 1824, foi un dos científicos europeos máis recoñecidos no seu tempo. Estudou na Universidade de Santiago de Compostela, onde chegou a ser catedrático de matemáticas. Ademais da súa labor científica, Rodríguez tamén destacou na política, sendo elixido deputado por Galicia en 1820, defendendo a creación dunha quinta provincia con capital en Santiago e o impulso do coñecemento científico e industrial en Galicia.
O acto de colocación da placa en Santiago é parte das actividades que a RAGC organiza para recoñecer o legado deste matemático e científico galego.
