O Ateneo de Santiago celebrará esta tarde, ás 19:30, a presentación do libro La teatralización de la política en España, escrito polo catedrático de Ciencia Política da UNED, Xavier Coller. O acto terá lugar no salón de actos de Afundación, situado na Rúa do Vilar, 19, e contará coa participación de Ramón Villares, catedrático de Historia Contemporánea na USC, a politóloga Nieves Lagares, e Xosé Ramón Pousa, membro da Xunta Directiva do Ateneo de Santiago.
Na súa obra, Coller explora a política parlamentaria en España, sinalando a complexa relación entre conflito e cooperación. Aínda que a política adoita ser percibida como un espazo de confrontación, o autor destaca que detrás desa aparente confrontación constante hai un alto grao de colaboración entre os representantes. O libro aborda esta paradoxa e desmonta a idea dunha política exclusivamente conflitiva.
Xavier Coller, con doutoramentos pola Yale University e a Universitat Autònoma de Barcelona, é un referente na análise da política contemporánea e conta cunha traxectoria destacada en investigación sobre elites políticas, organizacións complexas e identidade colectiva.