O vindeiro martes 1 de outubro de 2024, ás 19:30, terá lugar na sede de Afundación da rúa do Vilar unha conferencia titulada ‘Abandonade toda esperanza (ou non?) O federalismo e a mellor maneira de vivir xuntos’, impartida polo filósofo Manuel Cruz. A charla, que se enmarca nun debate sobre o federalismo como forma de convivencia, será presentada por Ramón Máiz, presidente da Asociación Federalista de Galicia e catedrático de Ciencia Política na Universidade de Santiago de Compostela.
Manuel Cruz, catedrático de Filosofía Contemporánea e Filosofía da Historia na Universidade de Barcelona, é recoñecido como un dos principais pensadores do federalismo en España. Co-fundador da asociación Federalistes d’Esquerres e con experiencia como Deputado e Senador, chegando a ser Presidente do Senado en 2019, Cruz ten unha ampla traxectoria académica e política. Entre as súas obras máis recentes destacan títulos como Democracia, la última utopía (2021) e El Gran Apagón. El eclipse de la razón en el mundo actual (2022).
