O presidente da Xunta, Alfonso Rueda, destacou a comunicación “continua” e “bastante fluída” que mantén o Goberno galego co Concello de Santiago, independentemente de quen sexa o interlocutor. Así respondeu ao ser preguntado este martes polos medios sobre por que o luns se reuniu co alcalde de Ames, Blas García, antes que coa rexedora da capital galega, Goretti Sanmartín, que leva meses pedindo un novo encontro con Rueda. A este respecto, o titular da Xunta lembrou que con Sanmartín “xa se reuniu” con anterioridade e con García “aínda non”. “Por tanto, isto non é ningunha competición”, apostilou.
En calquera caso, Rueda reafirmouse en que Xunta e Concello de Santiago están “en contacto” e lembrou que a semana pasada houbo unha reunión da alcaldesa co director de Turismo de Galicia, Xosé Merelles, para abordar a taxa turística que os municipios poderán implantar a partir do próximo ano. “Nós (Xunta) o que tentamos é atender as necesidades dos concellos, con interlocutores que en cada caso poden ter capacidade de resolución. Non se trata de se me recibe unha persoa ou outra, trátase de se resolven problemas”, remarcou o presidente.
