O Bloque Nacionalista Galego (BNG) celebrará o vindeiro 1 de decembro a súa XVIII Asemblea Nacional en Santiago de Compostela, coa intención de reforzar o seu proxecto político co obxectivo de “conquistar o goberno de Galicia”. Así o anunciou este sábado a portavoz nacional do BNG, Ana Pontón, durante a súa intervención no Consello Nacional da formación, que tivo lugar en Teo.
Pontón destacou que o BNG está no seu “mellor momento” e que a asemblea será unha oportunidade para afianzar a estratexia de crecemento que lle permitiu chegar a amplos sectores da sociedade galega, sen renunciar aos seus principios nacionalistas. “Reforzar a organización é clave para seguir avanzando e afrontar os retos que temos por diante”, asegurou.
A líder nacionalista fixo un chamamento a non caer no conformismo, destacando que o avance do BNG non é “punto e final”, senón unha tendencia sólida que permitirá converterse na forza hexemónica de Galicia. “Temos que seguir traballando con humildade para darlle a Galicia o futuro que merece”, subliñou.
Pontón tamén fixo fincapé en que o BNG é moito máis ca unha organización política, definíndoo como a “expresión da nación galega” e a esperanza dunha cidadanía que busca unha Galicia mellor.
