Os seis edís socialistas do Concello de Santiago de Compostela anunciaron que presentarán este mes de setembro unha “macroproposición” no pleno municipal. Segundo explicou o portavoz do grupo, Gonzalo Muíños, o obxectivo da proposta é reclamar ao goberno municipal, liderado por Goretti Sanmartín, que se aborden as “materias pendentes” para asegurar que a cidade manteña o ritmo de desenvolvemento dos últimos anos.
Entre as súas demandas destacan temas vinculados á vivenda, como a declaración de Santiago como zona residencial tensionada e a creación de apartamentos de aluguer para estudantes en colaboración coa Xunta e a Universidade de Santiago. No ámbito social, tamén incidiron na necesidade de mellorar a situación da UMAD (Unidade Municipal de Atención a Drogodependencias), así como realizar actuacións de mantemento en diferentes parroquias e mellorar os accesos ao Parque Alexandre Bóveda.
Ademais, os socialistas solicitan que o goberno local complete o proceso de estabilización do persoal municipal e busque solucións para anticipar as subvencións ás entidades deportivas.
PROXECTO DE FUTURO PARA A CIDADE
O grupo socialista tamén presentou un proxecto de futuro con seis puntos, un por cada edil, destacando a necesidade dun plan claro en mobilidade. Criticaron os “prazos pouco esperanzadores” en relación ao novo contrato de transporte público, así como a falta de avances nas licenzas de taxi e nos proxectos de novos aparcadoiros. Muíños tamén reclamou un aumento dos efectivos da Policía Local en Santiago.
En materia de vivenda, a edil Mercedes Rosón subliñou que Santiago “se enfronta a un dos maiores retos” e instou ao goberno a recuperar a empresa municipal de vivenda e chan, ademais de intervir no estado da cidade histórica. Pola súa banda, Mila Castro criticou a xestión da limpeza e o mantemento da cidade, sinalando que a “maleza impide o paso da xente” en varios puntos.
TURISMO E CONECTIVIDADE
No eido do turismo, o edil Sindo Guinarte cualificou as actuacións do goberno como unha “política de xestos” e lamentou a falta de avances no control de fluxos turísticos e na implantación da taxa turística. Tamén alertou sobre a conectividade aérea, indicando que se atopa “no punto máis baixo en moito tempo”.
Por último, as edís Marta Abal e Marta Álvarez incidiron en cuestións sociais e educativas, solicitando un programa plurianual de conciliación, unha nova ludoteca, e solucións para a problemática da UMAD e o centro interxeracional de San Pedro de Mezonzo, que segue sen estar operativo.
