A Sección Sexta da Audiencia Provincial da Coruña ditou unha sentenza, con data do 26 de febreiro, na que ratifica a existencia dun delito contra o medio ambiente na canteira de Miramontes, situada na parroquia de Grixoa, en Santiago de Compostela. O fallo confirma a condena ao responsable da empresa Tecnosolos Galaicos e á propia mercantil polos incumprimentos da autorización ambiental que derivaron en contaminación do chan e das augas.
Segundo a resolución xudicial, considérase probado que a actividade desenvolvida pola empresa —centrada na elaboración de tecnosolos, é dicir, chans artificiais a partir de residuos para a restauración ambiental— non se axustou ás condicións autorizadas, xerando impactos negativos na contorna. A sentenza conclúe que, entre os anos 2016 e 2017, se produciron incumprimentos “conscientes e continuados”, incluíndo o almacenamento de residuos en zonas non permitidas, a superación da capacidade máxima autorizada e a presenza de materiais expostos á intemperie.
O fallo recolle tamén a xeración de lixiviados e verteduras sen tratamento, así como a afectación ao subsolo e ás augas, constatando a presenza de substancias contaminantes por riba dos límites legais, entre elas cadmio, nitratos, hidrocarburos, chumbo e zinc.
Como consecuencia, o responsable da empresa aceptou unha pena de 18 meses de prisión, ademais dunha multa e a inhabilitación durante 18 meses para actividades vinculadas coa xestión de residuos. Pola súa banda, a empresa foi sancionada economicamente.
REACCIÓN DAS ENTIDADES VECIÑAIS
A sentenza foi valorada pola Federación de Asociacións do Rural de Santiago (Ferusa) e pola Plataforma de Afectados polo Vertedoiro de Santiago de Compostela – Miramontes, que consideran que o fallo supón un respaldo ao traballo desenvolvido durante anos. As entidades sosteñen que “o que debía ser unha actuación de mellora ambiental acabou converténdose nun foco de contaminación”.
Neste sentido, inciden en que o material depositado non pode ser considerado tecnosuelo, senón unha vertedura de residuos que debe ser retirada. “A retirada do material é un deber ratificado xudicialmente que debe executarse sen máis demora”, sinalan.
EXIXENCIA DE ACTUACIÓN Á XUNTA
As organizacións lembran que a empresa se atopa en situación de concurso de acredores, pero advirten de que esta circunstancia non debe impedir a execución das obrigas ambientais. “Non pode converterse nunha escusa para perpetuar o dano ambiental nin para deixar sen executar os deberes de restauración”, afirman.
Por último, reclaman á Xunta de Galicia, como administración competente, que adopte as medidas necesarias para garantir a retirada dos residuos e a recuperación ambiental da zona, e solicitan a elaboración dun calendario público de actuacións.
