O concelleiro de Mobilidade de Santiago de Compostela, Xan Duro, respondeu ás críticas do Partido Popular en relación á modificación das liñas de autobús que afectan ao barrio de Casas Novas. O concelleiro defendeu as decisións tomadas polo goberno local e cualificou de “falsas” as acusacións de “oscurantismo” e “improvisación” feitas polos populares.
Os que me seguides sabedes que non son de entrar en polémicas no tuiter pero é que o meu querido @vitorad non me deixa moita opción. Volvo como mesmo: datos claros e o máis concisos posíbeis. Vai fío
— Xan Duro (@xanduro) August 29, 2024
Nun fío publicado na súa conta de Twitter, Duro detallou que a reorganización do transporte público responde á necesidade de adaptar as liñas ao corte da Rúa do Pombal, unha das arterias principais do sistema de transporte compostelán, debido ás obras que alí se están a realizar desde o pasado 25 de xuño. Segundo explicou, a liña 4 substitúe á liña 9 para manter o servizo no barrio de Casas Novas, mantendo o mesmo número de frecuencias e adaptando os horarios.
Duro afirmou que a reorganización non foi improvisada, senón que se baseou nun estudo realizado pola empresa municipal TUSSA para minimizar as molestias aos veciños. Ademais, asegurou que se informou amplamente sobre os cambios a través de roldas de prensa, carteis nas paradas, dípticos informativos e comunicacións ás asociacións veciñais.
En resposta ás críticas de Adrián Villa, concelleiro do PP, que cualificou de “tirana” a actuación do BNG e acusou ao goberno local de deixar ao barrio sen servizo, Duro afirmou que as modificacións temporais do percorrido foron debidamente comunicadas e que se manteñen as frecuencias de transporte. “Non se eliminaron liñas, modificáronse para adaptarse á situación provisional”, subliñou.
Finalmente, Duro convidou ao PP a propoñer alternativas mellores se as teñen, destacando que TUSSA traballou exhaustivamente para estudar todas as posibles solucións e escoller a que menor impacto tivese na veciñanza. “Se Adrián Villa ten un plan mellor, estou disposto a escoitalo”, sentenciou o concelleiro.
